Кыргызстандын Абадан коргонуу күчтөрүнүн Ми-8МТВ тик учагы кулап, бир аскер кызматкери каза болуп, дагы сегизи жараат алды. Бул тууралуу Коргоо министрлигинин басма сөз кызматы билдирди.
Маалыматка ылайык, төртөө жандандыруу бөлүмүндө жатат, бирөө өтө оор абалда. Калган төртөөнүн абалы орто. Бардыгы тез жардам ооруканасында.
«Коргоо министрлигинин жана Абадан коргонуу күчтөрүнүн тиешелүү кызматкерлери тарабынан кырсыктын чоо-жайын тактоо иштери жүргүзүлүүдө», — деп билдирди мекеме.
Буга чейин маалымдалгандай, Ми-8 тик учагы саат 11.00 чамасында Достук айылына жакын жерде жайгашкан «Фрунзе-1» авиабазасына кулап түшкөн.
