Жүз жаштагы Улуу Ата Мекендик согуштун ардагерине жаңы батир берилди. Бул тууралуу президенттин Чүй облусундагы ыйгарым укуктуу өкүлүнүн аппаратынан билдиришти.
Фото Президенттин Чүй облусундагы ыйгарым укуктуу өкүлүнүн аппараты. Кошкоро Жаманкулов
Облус башчысы Канат Жумагазиев аксакалга Кара-Балтадагы жаңы батирдин ачкычын тапшырды. Ал эми Жайыл районунун акими Төрөгелди Түркбаев ага ардактуу атуул наамы ыйгарылганын билдирди.
Кошкоро Жаманкулов Улуу Ата Мекендик согуштун экинчи топтогу майыбы. Ал 1924-жылы туулуп, кичүү уулу, келини жана неберелери менен Кайсар айылында жашап келген. Анын 7 баласы, 31 небереси жана 58 чөбөрөсү бар.
