Токтобай Маанаев Улуттук госпиталдын башкы дарыгеринин милдетин аткаруучу кызматынан бошотулду. Бул тууралуу Саламаттык сактоо министрлигинин басма сөз кызматы билдирди.
Маалыматка ылайык, жаңы жетекчи дайындалганга чейин башкы дарыгердин милдетин аткаруу Улуттук госпиталдын башчысынын орун басары Улукбек Кулукеевге жүктөлдү.
Эске салсак, 2023-жылдын 22-сентябрындагы буйруктун негизинде Бакыт Төлөгөнов медициналык мекеменин башкы дарыгери кызматынан бошотулуп, анын ордуна Токтобай Маанаев дайындалган. Ал кызматта бир нече күн иштеген, андан кийин саламаттыкты сактоо министрлиги өз чечимин жокко чыгарган.
Буга чейин Улуттук госпиталдын башкы дарыгери Токтобай Маанаевге карата кылмыш иши козголгону маалымдалган. УКМКнын маалыматы боюнча, медициналык мекемеде коррупциялык схемалар аныкталган.
