Бишкекте шаардык милициянын жетекчиси Азамат Ногойбаев анын кызматтан кетишин талап кылган акцияны чагылдырган журналисттер менен жолукту.
Баш калаанын милиция башчысы 31-мартта өткөн түз эфир маалында айткандарын «айрымдар туура эмес түшүнүп алганын» белгилеп, ал үчүн кечирим сурады.
«Дал ушул «өздөрү» деген сөз туура эмес болуп калганын мойнума алам. Мен коомдук кишимин, бирок түз эфирде юрист катары эмес, өзүмдүн сөзүмдү айтып алыпмын. Ушул тапта өспүрүмдөрдүн коопсуздугу үчүн бардык шарттарды түзүү аракети болууда», — деди Ногойбаев.
Ал кызматтан кетүү тууралуу берилген суроону комментарийсиз калтырды.
Ногойбаевдин кызматтан кетишин талап кылып, акцияга чыккан 10дон ашуун активист менен шаардык милициянын башчысы Бишкек шаардык милициясынын имаратынын ичинде жолугууну сунуш кылган, бирок активисттер «басым болот» деген чочулоодон улам андан баш тарткан.
31-мартта Ногойбаев Фейсбукта түз эфирде суроолорго жооп берип жатып, шаарда өспүрүм кыздар зордукталган учурлар көп катталып жатканын, алардын арасында «жыныстык катнашка өз эрки менен баргандар» бардыгын айткан.
Бишкектин милиция жетекчисинин мындай билдирүүсүн коомчулук, укук коргоочулар кескин сындады. Ички иштер министрлигинин (ИИМ) Ички иликтөө кызматы Ногойбаевдин айткандарына байланыштуу териштирүү баштаганын маалымдаган.
