23-мартта АКШ Конгрессинде TikTok’тун башкы директору Шоу Цзы Чунун катышуусунда угуулар өттү. Ал Өкүлдөр палатасын америкалыктар үчүн тиркемени колдонуу коопсуз экенине ишендирүүгө аракет кылууда.
АКШ TikTok үчүн 150 миллондон ашык колдонуучусу бар ири базарлардын бири болуп эсептелет. Конгресс Кытай бийлигинде америкалыктардын маалыматын алууга мүмкүнчүлүк бар-жоктугун түшүнүүгө аракет кылууда. Эгер маалыматтар Бээжинге жеткиликтүү болсо, анда бул социалдык түйүнгө тыюу салууну же аны кытай бийлигинен көз карандысыз кылууга жетишүүнү көздөп жатат.
Конгрессте сүйлөгөн TikTok’тун башкы директору Шоу Цзы Чу колдонуучулардын маалыматтары ачыкка чыгып кетпей турганын убадалап, АКШда компанияга «көз карандысыз үчүнчү тарап» мониторинг кылса болорун билдирди.
Марттын аягында америкалык аткаминерлердин федералдык өкмөт тарабынан берилген смартфондоруна TikTok тиркемесин орнотууга салынган тыюу күчүнө кирет. Буга чейин өз аткаминерлери үчүн ушундай эле тыюуну Улуу Британия жана Европарламент киргизген.
Ушул тапта АКШнын Федералдык иликтөөлөр бюросу (ФБР) менен Юстиция министрлиги TikTok платформасына ээлик кылган ByteDance кытай компаниясына карата тергөө иштерин жүргүзүүдө. Маалыматка караганда, ByteDance’тын кызматкерлери TikTok тууралуу макала жазган журналисттерди аңдуу үчүн аккаунттардагы катталуу маалыматтарын колдонушкан. Бул окуядан кийин компаниянын кызматкерлери иштен алынып, ByteDance колдонуучулардын маалыматтарын америкалык серверлерге жайгаштырууга макул болгон. Бирок компания дале болсо Кытайдын бийлиги менен кызматташат деп шектелүүдө. Өз кезегинде Бээжин Вашингтонду TikTok’ту АКШ базарынан чыгарууга аракет кылып жатат деп айыптап келет.
Ал арада АКШ Конгрессинин алдында активдүү TikTok колдонуучулары пикет өткөрүп, саясатчылардан соцтүйүндү жайына коюуну талап кылып жатышат.
Америкалык юристтердин айтымында, TikTok бөгөттөлгөн күндө да жарандар ал чечимди жокко чыгаруу өтүнүчү менен Жогорку сотко кайрыла алышат.
Индия TikTok баштаган бир топ кытай тиркемелерин 2020-жылы бөгөттөгөн.
