13:09
USD 89.43
EUR 96.57
RUB 0.97

Бишкек жана Алматы шаарларында аялдардын укуктарын коргоо акциялары өттү

8-март — Аялдардын эл аралык күнүнө карата Казакстандын Алматы шаарында кыз-келиндердин укуктарын жактагандар митингге чыгышты. Калаанын борбордук бөлүгүнөн алысыраак жайгашкан Ганди атындагы паркта өткөн иш-чарага миңге жакын адам чогулду.

«Азаттык» радиосунун казак кызматынын маалыматына караганда, митингге чыккан активисттер негизинен сексуалдык зомбулукка каршылык билдирип, өлкөдө аялдарга кордук көрсөткөндөр көп учурларда жазасыз каларына нааразылык билдиришти. Мындан тышкары ыдык көрсөтүүгө каршы мыйзам кабыл алууну талап кылып, парламент менен жогорку кызматтарда аялдардын санын көбөйтүүгө чакырышты.

8-мартта Кыргызстандын баш калаасы Бишкен шаарында да гендердик зомбулукка жана басмырлоого каршы аялдардын тилектештик жүрүшү өттү. Акцияга болжол менен 500гө жакын киши катышты. Спорт ордосунан баштап Уркуя Салиеванын эстелигине чейин эки чакырымдай жолду жөө басып өткөн жүрүштүн катышуучулары кыздардын, аялдардын бардык укуктарын сактоо, аларды зордук-зомбулуктан коргоо жана гендердик теңчиликти камсыз кылуу талаптарын коюшту.

Уюштуруучулар акция Бишкек мэриясы жана милиция менен макулдашылганын айтышты. Иш-чаранын коопсуздугун ички иштер органдарынын кызматкерлери камсыз кылышты.

Акциянын айрым катышуучулары демонстранттардын бирин кармап кетип жатышканына күбө болгонун маалымдашты. Алардын айтымында, милиционерлер бир эркекти күчтөп жетелеп кетишти, аны каяка алып кетишкени азырынча белгисиз.

«Милиция кызматкерлери украин тилинде жазылган жана ЛГБТ символикасы тартылган плакат көтөргөндөргө тандап барып жатышат», — деп жазды Kloop.kg. Басылма жарыялаган видеодон кармалган киши түстүү беткап тагынып жүргөнүн көрүүгө болот. Милиция формасын кийген жана жөнөкөй кийимчен бир нече киши анын беткабын сыйрып, жетелеп кетип жатканын көрүүгө болот.

Эң көп окулган жаңылыктар