«М-РАЙН» фармацевтикалык компаниясынын дары сактоочу жайы убактылуу жабылды. Бул тууралуу атайын кызматтан кабарлашты.
УКМК фармацевтикалык компаниялардагы, дары-дармек жана медициналык каражаттар департаментиндеги коррупциялык иштер боюнча тергөө амалдарын улантып жатканын маалымдады. Анын алкагында алынган далилдерди табуу максатында «М-РАЙН» ЖЧКсынын кампаларында издөө иш-чаралары жүргүзүлгөн.
«Ири көлөмдөгү дары-дармектердин табылганын эске алып, тиешелүү тергөө амалдарын жүргүзүү үчүн «М-РАЙН» ЖЧКсы колдонгон сактоочу жайына мөөр басылды» ,— деп айтылат маалыматта.
Белгилей кетсек, «М-РАЙН» компаниясынын кампасы Бишкектеги 5-кичирайондо жайгашкан. osoo.kg сайтындагы маалыматтар боюнча, компаниянын директору Фуат Алиев. Фирма дүкөндөргө фармацевтикалык товарларды ташуу менен алектенет.
