19:27
USD 84.80
EUR 102.77
RUB 1.13

Бишкекте Франциянын президентине каршы митинг өттү

1-ноябрда Бишкек шаарында 500дөй киши Франциянын президенти Эммануэл Макронго каршы акцияга чыгышты. Алар Мухаммед пайгамбарды шакаба сүрөттөргө тартууну жана исламга каршы чакырыктарды токтотууну талап кылышты.

Акциянын уюштуруучусу, активист Абдулхамид Таштанов француз лидерин дүйнө мусулмандарынан кечирим суроого чакырды. Митингде экс-депутат Турсунбай Бакир уулу да сөз сүйлөдү.

Чогулгандар «Франция, исламдан колуңду тарт», «Биз карикатурага каршыбыз», «Биз исламды кемсинтүүгө жол бербейбиз», «Биз пайгамбарыбызды сүйөбүз» деп жазылган транспаранттарды кармап турушту.

30-октябрда Ош шаарында да ушундай акция өткөн. Анда Макрондун жүзүнө буттун изи түшүрүлгөн сүрөттөр калаадагы жолдордун жүргүнчүлөр өтчү жерлерине жабыштырылган.

16-октябрда Париждин жака-белинде тарых жана география мугалими Самюэл Пати өлтүрүлгөн. Француз бийлиги аны Абдулла аттуу 18 жаштагы чечен качкын өлтүргөнүн билдирген. Андан бир нече күн мурда мугалим сабакта сөз эркиндиги тууралуу кеп кылып, класстагы окуучуларга «Charlie Hebdo» журналы тарткан Мухаммед пайгамбардын карикатурасын көрсөткөн.

Эң көп окулган жаңылыктар