Бишкек шаарынын мурдакы мэри Нариман Түлеевдин мүлкү мыйзамсыз конфискацияланган. Бул тууралуу бүгүн Жогорку Кеңештин жыйынында депутат Рыскелди Момбеков билдирди.
Анын айтымында, Нариман Түлеевдин мүлкүн конфискациялоо боюнча соттун өкүмүндө айтылган эмес.
«Ал түрмөдө олтурду, кетирген чыгымды төлөп берди. Бирок, ага карабай, мүлкүн дагы, атасынын ишканаларын кошо конфискациялап жатат. Бул эмне деген? Соттун өкүмүндө мүлкүн тартып алуу жөнүндө айтылган эмес. Бир гана камоо керектиги айтылган. Бирок, ага карабай рейдерлик кылып тартып алышкан. Жаңы жагдайлар боюнча ушуну карап чыксаңар», — дейт Момбеков.
Эскерте кетсек, Нариман Түлеев «жемкорлук» беренеси менен соттолгон.