Акыркы жылдары Кыргызстандын шоу-бизнесинде коендой окшош ырчылар көбөйдү, айрыкча кийинүү стили, чач, каш жасалгалары, ал тургай ооздору дагы окшош дегенди көп угуп калабыз.
24.kg агенттиги стили жагынан башкалардан айырмаланып, эпатаждуу образдары менен сахнаны багындырууга аракет кылган ырчыларды тизмектеди.
Кайрат Кыргыз деген лакап ат менен таанымал ырчы Кайрат Салмакеев буга чейин фольклор жаатындагы ырларды созолонтуп, комузда кол ойнотуп келген. Анын акыркы жылдары аткарып чыккан «Жаштык кез», «Жактырам» деген ырлары эл оозуна тез алынып, жаңы стили кызуу талкуу жаратты.
Ырчынын күйөрмандары аны туурап чачтарын сарымсак сымал жасап, ырын аткарып интернетке таратышкан. Бирок, анын чийилген кашын сындагандар да четтен чыккан. Кыргыздын улуттук кийимин кийип эле ырдап жүрүүнү сунуштагандар да болгон.
Эпатаждуу ырчылардын катарында Каныкей дагы бар. Ал өзгөчө образ менен чыккандыктан, угармандардын эсинде азыр деле сакталуу.
«Туфли», «Күйөө издейм» деген өзгөчө аталыштагы ырлардын аткаруучусу өзгөчө стили бар Назель айым. Анын ырлары гана эмес, турган турпаты жана сырткы көрүнүшү башкалардан таптакыр айырмаланып турат. Анын айрыкча кирпиктери эле бир тайлык.
Лира Севен аттуу өзгөчө ысым менен таанымал ырчы «Кыргыз жигит», «Жашоо керемет», «Эркетаймын» аттуу чыгармаларды аткарган. Анын чач жасалгасы башкалардан айырмаланып турат.
Лира Севен ырчылыктан башка кол өнөрчүлүк менен да алектенип келгенин айтат. Ал улуттук баш кийимдердин түрлөрүн жасайт.
Беткапчан Тата Уланды жаш балдардан тарта кары кишилерге чейин билишет. Өзүн этноакынмын деген ырчынын «Карындаш», «Көлдү сактайлы», «Баары бир» аттуу чыгармалары бар.
Индира аттуу ырчы айым Тата Уландан кем калышпай беткап кийгендердин катарын толуктады. Анын аткаруусунда «Мен киммин?», жана «Акча деп» деген ырлары коомчулукка белгилүү.
