2018-жылы жарандардан 5 миң 986 кайрылуу түшкөн. Бул тууралуу өкмөттүн маалымат кызматы билдирет.
Алардын маалыматында, анын 531 президентин аппаратына, 763ү Жогорку Кеңешке, 1 миң 299у премьер-министрдин аппаратына жолдонгон. Каттардын 22 пайызы интернет аркылуу жөнөтүлгөн.
65 кат КМШга мүчө-мамлекеттерден жана алыскы чет өлкөлөрдөн келген.
Өлкө ичинен көбүнчө Бишкек шаарынын тургундары бийлик органдарына арызын жолдошот. Бир жылда 2 миң 233 киши кат жазган.
2018-жылы өкмөт башчысынын коомдук кабылдамасында 274 жаран жеке маселеси боюнча болгон.
Кайрылуулардын саны 2017-жылга салыштырмалуу 794кө көбөйгөн.
«Кайрылуучулардын негизги бөлүгү — пенсия курагындагы кары адамдар жана башка социалдык жактан корголбогон жарандар болуп саналат. Алар тараптан козголгон кайрылуулардын темасы кеңири саналып, жашоонун бардык тармактарына тийиштүү саналат», — дейт өкмөт.
Атуулдар өкмөттөн көбүнчө турак-жай маселесин чечип берүүнү өтүнөт (15,94 %). Андан сырткары, социалдык кызматтардын иши, пенсиялар, жеңилдиктер, жөлөкпулдар жана материалдык көмөк көрсөтүүнү (9,4 %), прокуратурага (6,31 %), билим берүү жана илим тармагына (6,14 %), милицияга (4,79 %), саламаттык сактоо жагына (3,96 %) арызданышат.