1-августта Орол шаардык соту Батыш Казакстан облустук кеңешинин мурдагы депутаты Кайдар Кошановду беш жылга шарттуу түрдө эркинен ажыратты.
Облустук ички иштер департаменти кабарлагандай, быйыл 29-мартта Оролдо жол кырсыгы болуп, Тoyota Land Cruiser 200 унаасы Самара-Шымкент жолунда «Лада Приора» жана «Ауди» унааларын сүзгөн.
Тoyota Land Cruiser 200 унаасынын рулунда Кайдар Кошанов отурган. Жол кырсыгынан «Лада» унаасынын 22 жаштагы айдоочусу Вячеслав Лопухин менен 63 жаштагы апасы Надежда Кондрашкина каза тапкан. «Ауди» унаасынын айдоочусу жаракат алган.
Сотто каза тапкандардын туугандары Кошановду түрмөгө кеспөөнү сурашты. Маслихаттын мурунку депутаты жабыр тарткандарга кун төлөп берүүгө тийиш. Анын суммасы сот өкүмү күчүнө кирген соң аныкталат.
