Кыргызстанда жер тилкелерин мыйзамдаштыруу кампаниясы башталгандан бери 170 миң 626 арыз түшкөн. Бул тууралуу Жер ресурстары, кадастр, геодезия жана картография мамлекеттик агенттиги билдирди.
Мекеменин маалыматына караганда, ыйгарым укуктуу органдар жарандарга жер тилкелерине укук берүү боюнча 76 миң 482 чечим кабыл алган. Кароонун жыйынтыгы менен жеке менчик укугуна 64 миң 599 мамлекеттик акт жана 43 миң 267 техникалык паспорт берилген. Мунапыс берилген жерлердин аянты 10 миң 325 гектарды түзөт.
Жерге мунапыс объектилерге укуктук статус берүү үчүн бир жолку акция болуп саналат деп эскертишти чиновниктер. Жер тилкелерин мыйзамдаштырууну каалаган кыргызстандыктар 1-июлга чейин райондук администрациялардын жана мэриялардын алдында иштеп жаткан жерлерге мунапыс боюнча комиссияларга кайрылышы керек.
Эске салсак, 2022-жылдын май айынын аягында министрлер кабинети Жерге мунапыс берүүнүн тартиби жөнүндө жобону бекиткен. Документ мамлекеттик органдардын жана жергиликтүү өз алдынча башкаруу органдарынын калктуу пункттарды жерлердин категориясына которуу (трансформациялоо) боюнча ишин уюштуруунун негизги эрежелерин жана жол-жоболорун аныктайт.
