Кыргызстандын футбол боюнча жаштар курамасы Испаниядагы машыгуу жыйыны алкагындагы алгачкы жолдоштук беттешин өткөрдү. Бул тууралуу Кыргызстандын футбол биримдиги социалдык тармактарда билдирди.
Кыргыз курамасы Испаниянын экинчи дивизионунда (Сегунда) ойногон клубду 5:0 эсебинде утуп алды. Голдорду Ырыскелди Маданов, Азамат Ташбалтаев, Нурислам Орунтаев, Умар Мадаминов киргизишти. Автогол да жазылды.
Кабарларга караганда, Картахена Сегунда турниринде экинчиден акыркы орунда турат.
Эске салсак, Кыргыз курама командасы февраль айында Кытайда баштала турган Азия Кубогунун финалдык этабына даярдык көрүү үчүн Аликанте шаарында машыгууда.
