Түркияда Стамбул шаарынын башчысын шайлоодо президент Режеп Тайып Эрдогандын атаандашы, азыркы мэр Экрем Имамголу алдыда келе жатат. Бул тууралуу түрк басылмалары добуш берүүнүн болжолдуу жыйынтыктарына шилтеме кылып билдирүүдө.
Добуштардын дээрлик баары саналгандан кийин Имамоглу Мурат Куримден 10 пайыздан ашык добуш алды.
Анкаранын азыркы мэри, оппозициядагы Республикалык-элдик партиянын өкүлү Мансур Яваш да Түркиянын баш калаасынын башчысын кайра шайлоодо алдыда келе жатат.
Жекшембиде Түркияда муниципалдык шайлоо болуп өттү. Талдоочулар муну 2028-жылдагы президенттик шайлоо алдындагы биринчи күч сынашуу катары баалашууда. Анда Эрдоган кайра шайлоого катыша албайт. Стамбулдун мэри оппозициялык күчтөрдүн потенциалдуу талапкери катары каралууда.
Республикалык-элдик партия Измир жана Анталия сыяктуу башка чоң шаарларда да алдыда экени кабарланууда жана өлкө боюнча 39%га жакын добуш менен Эрдогандын тарапкерлеринен озуп кетишти.
Түркиянын түштүк-чыгышындагы бир катар аймактарда адаттагыдай эле күрддөрдү колдогон DEM партиясы лидерлик кылууда.
Эрдоган 2014-жылдан бери президент, ага чейин премьер-министр катары түрк саясатында маанилүү роль ойногон. Өткөн жылы ал президенттик шайлоодо оппозициянын талапкери Кемал Кылычдароглуну жеңген.
