Жогорку Кеңештин депутаты Шайлообек Атазов УКМКга суракка чакырылды. Бул тууралуу анын Facebook баракчасында билдирилди.
24.kg агенттигинин булактарынын маалыматы боюнча, ал депутаттыкка талапкер болгон бир мандаттуу округ боюнча шайлоодо добуш сатып алуу боюнча кылмыш ишинин алкагында суракка алынат.
Шайлообек Атазов өзү добуш сатып алууга тиешеси бар экенин четке кагууда.
Буга чейин ал Свердлов району боюнча шайлоо учурунда анын тарапташтары болгон адамдар бир нече күндөн бери убактылуу кармоо жайында 3-4 сааттап кыйноого кабылганын билдирген.
«Мага айткан маалымат боюнча, шайлоо учурунда Райымбек Матраимов акча берген деп жазгыла деп жатышыптыр. Ата-энелери ыйлап келишти», — деп жазган Шайлообек Атазов.
Ал «кудайдын, элдин, досторунун, жаштардын, спортчулардын жана ЖМКлардын колдоосу менен» Жогорку Кеңешке депутат болгонун, бул үчүн ыраазы экенин айткан.
