Украинадагы кырдаалдан улам Борбордук Азия жана Кавказ аймагында жакырчылыктын көлөмү 1 пайызга өсүүсү күтүлөт. Бул тууралуу Эл аралык валюталык фонду маалымдайт.
Алардын маалыматында, Украинадагы кырдаал аталган региондо инфляциянын деңгээлине жана акчалай которуулардын көлөмүнө таасир берүүдө. Жыйынтыгында жакырчылыкта жашагандардын саны дагы 1 миллион адамга көбөйүшү мүмкүн.
«Азык-түлүккө баанын кымбатташы аз камсыз болгон үй-бүлөлөргө катуу таасир берет. Анткени Азербайжан, Кыргызстан жана Тажикстанда кирешесинин 60-70 пайызын азык-түлүккө жумшашат», — дейт уюм.
Армения, Грузия, Кыргызстан, Тажикстан жана Өзбекстан өлкөлөрүндө акчалай которуулар ички дүң продукциянын 10-30 пайызын түзөрү айтылат.
Кыргызстан менен Тажикстан үчүн Россия акчалай которуулардын башкы булагы болуп саналат.
Санкциялардын Россиянын өндүрүшүнө таасири күчөп, башка тармактар менен бирге миграциялык моделдин дагы өзгөрүүсүнө алып келет.