2015-жылы Жерүй алтын кени боюнча ѳткѳн конкурстун мыйзамдуулугу жана адилеттүүлүгүнѳ укуктук баа берүү керек. Бул талап менен «Жерүй: кѳйгѳйлѳр жана чечүү жолдору» аталышындагы тегерек столдун катышуучулары өкмөткө кайрылды.
Кайрылууда президент жана премьер-министрден Жерүй алтын кенинде мамлекетинин үлүшүн милдеттүү түрдѳ болушун камсыз кылуу керектиги айтылат.
«Жерүй алтын кениндеги экология жана коопсуздук маселесин, түзүлгѳн фонддордогу каражаттын сарпталышын, жумушчулардын укуктарын кѳзѳмѳлгѳ алуу зарыл», — деп белгиленет.
Ал эми Жогорку Кеңешке 2015-жылы Жерүй алтын кени боюнча ѳткѳн конкурстун мыйзамдуулугу жана адилеттүүлүгүн текшерүү максатында мамлекеттик комиссия түзүү сунушталат. Бул боюнча Башкы прокуратура атайын териштирүү жүргүзүп, укуктук баа берүү керектиги айтылат.
Белгилей кетсек, буга чейин дагы жарандык активисттер Жерүй алтын кени боюнча өкмөткө кайрылышкан.
