Мыйзамдагы ууру Азиз Батукаевдин мыйзамсыз боштондукка чыгып кетиши боюнча ИИМдин мурдагы башчысы, азыркы депутат Зарылбек Рысалиев суракка алынды. Бул тууралуу ИИМден билдиришти.
Буга чейин Башкы прокуратура ИИМдин тергөө кызматына сотко чейинки териштирүү ишин жүргүзүү тапшырмасын берген.
«Азиз Батукаевдин иши боюнча шектелип жаткан жарандарга жемкорлукка жана документтерди жасалмалоого катышкан деген айып тагылууда. Аталган кылмыш иштин алкагында мурдагы ички иштер министри Зарылбек Рысалиев суракка алынды», — деп билдиришти ИИМден.
Эске салсак, Азиз Батукаевди мыйзамсыз бошотуу боюнча кылмыш иши ушул жылдын январында жаңыланган. Ал боюнча ууруга рак дартын койгон дарыгерлер жана лаборанттар сурак берүүдө.
