Ташкент-Балыкчы авиакаттамы жанданышы мүмкүн. Бул тууралуу Кыргызстандын Өзбекстандагы элчиси Ибрагим Жунусов Өзбекстандын Учуулардын коопсуздугун көзөмөлдөө инспекциясынын башчысы Толиб Ульжаев менен жолугушуу маалында белгилүү болду. Бул тууралуу Тышкы иштер министрлигинин басма сөз кызматы кабарлады.
Маалыматка ылайык, тараптар жарандык аба жаатында эки тараптуу кызматташуунун учурдагы абалы жана кыргыз-өзбек авиация кызматтарынын ортосундагы мындан аркы өз ара алакалашуу жөнүндөгү маселелерди талкуулашты.
Кыргыз тарап Ташкент-Балыкчы маршрутундагы чартердик каттамдарды кайрадан баштоо боюнча сунушун киргизди. Мындан сырткары, тараптар «Ош-Ташкент-Ош» багытындагы каттамдар жөнүндө маселелерди талкууга алышты.
