Жазуучу Чыңгыз Айтматовдун 90 жылдыгына карата, режиссер Мухтар Атаналиев «Айтматовдун каармандары 60 жылдан кийин» аттуу 10 мүнөттүк кинороликтерди тартат. Бул тууралуу режиссер 24.kg агенттигине билдирди.
Фото Режиссер Мухтар Атаналиев киноролик тартуу учурунда
Айтымында, киноролик 3 бөлүктөн турат. Анда «Бетме-бет», «Жамиля», «Ак кеме» тасмаларында тартылган баш каармандардын 60 жылдан кийинки кездешүүсү тууралуу сюжет болмокчу.
«Негизи 4 бөлүктөн турмак, тилекке каршы «Кызыл жоолук жалжалым» тасмасында Ильяздын ролун аткарган актер Дүйшөн Байдөбөтов каза болуп калгандыктан, 3 гана бөлүк тартыла турган болду. Учурда тартуу иштеринин 30 пайызы аяктап калды. Октябрдын соңунда роликтер толугу менен бүтүп, элге тартууланат», -деди Мухтар Атаналиев.
Фото Наталья Аринбасарова жана Насирет Дубашов
