Өткөн сутка ичинде 4 киши сууга чөгүп каза болду. Бул тууралуу ӨКМнын басма сөз кызматы билдирди.
Маалым болгондой, ӨКМнын Бишкек шаардык куткаруу кызматынын куткаруучулары Чоң Чүй каналына түшүп кеткен 1976-жылы туулган С.А. аттуу кишинин сөөгүн алып чыгып, Свердлов РИИБнин кызматкерлерине өткөрүп беришкен.
Чүй облусунун Аламүдүн районунда Энергетик дачасындагы көлмөгө чөгүп кеткен 2001-жылы туулган Ж. у Н. аттуу жарандын жансыз денесин суудан чыгарышып, ИИМ кызматкерлерине өткөрүп беришкен.
Ысык-Көл облусунун Тоң районунун № 1 Кекилик пляжында 2002-жылы туулган Т у. Ы. аттуу жаран чөгүп кеткен. Куткаруучулар маркумдун жансыз денесин таап туугандарына өткөрүп беришти.
Ысык-Көл районунун Чок-Тал айылынын Лазурный Берег пансионатында 1994-жылы туулган А.Т.Э. аттуу эркек киши чөгүп кеткен. Куткаруучулар тарабынан издөө иштери жүргүзүлүп, маркумдун жансыз денеси РИИБ кызматкерлерине өткөрүлүп берилди.
Ошондой эле Жалал-Абад облусунун Кызыл-Алма айылынын тургуну 1972-жылы туулган Б. Т. аттуу жаран 21-июнь күнү агасынын үйүнөн чыгып кеткен бойдон үйүнө кайтып келген эмес. Анын туугандары Нарын дарыясынын жээгинен издеп берүүнү суранышкан. Издөө иштерин жүргүзүүдө натыйжа болгон жок.
