Президент Жумгал районунун Өрнөк айылынын дайынсыз жоголгон тургундарын издөө иштерин күчөтүүнү тапшырды.
Мамлекет башчынын маалымат кызматы Садыр Жапаровдун тапшырмасы менен Жумгал районунун Өрнөк айылында дайынсыз жоголгон 45 жаштагы К.Б. жана 9 жаштагы уулу С.Б. аттуу тургундарын издөөгө ӨКМ менен Ички иштер министрлигинин кошумча күчтөрү тартылганын тастыктады.
Издөөнүн натыйжалуулугун жогорулатуу максатында дрондор да колдонулат. Азыр издөө иштери Жалал-Абад облусунун Токтогул районунда да жүрүп жатат, анткени Көкөмерен дарыясы бул аймакка тез жетет.
Буга чейин маалымдалгандай, Нарын облусунун Жумгал районунда куткаруучулар дайынсыз жоголгон эки адамды издеп жатышат.
19-октябрда 45 жаштагы эркек киши менен 9 жаштагы бала 16-октябрда жайлоого мал жаюуга кеткени, андан бери байланышка чыкпай жаткандыгы тууралуу маалымат түшкөн.
