Атайын кызмат Ысык-Көл облусунун Тоң райондук сотунун төрагасын пара алып жаткан жеринен кармаганын УКМКнын басма сөз борбору билдирди.
Судья А.Г.Н. 27-сентябрда ортомчусунан 3 миң доллар алып жаткан жеринен кармалган. Тинтүү учурунда андан 2,5 миң доллар, ортомчудан калган 500 доллар табылган.
28-сентябрда Соттор кеңешинин чечиминин негизинде кармалган жаран айыпталуучу катары киргизилди. Бишкектин Биринчи Май райондук соту ага карата 17-ноябрга чейин УКМКнын тергөө абагында камакка алуу түрүндөгү баш коргоо чарасын тандады.
Белгилей кетсек, УКМК буга тиешеси бар башка адамдарды аныктоо боюнча кошумча тергөө иш-чаралары жүрүп жатканын белгиледи.
