Саламаттыкты сактоо министри Алымкадыр Бейшеналиев жакынкы айларда дарыгерлердин айлыгы көтөрүлөрүн убада кылды. Бул тууралуу ал брифингде билдирди.
Министр конкреттүү шарттарды жана келечектеги айлык акынын көлөмүн айткан жок. Анын айтымында, алар 50 пайыздан 100 пайызга чейин көбөйөт.
«Биздин финансисттер буга чейин эсептөөлөрдү жүргүзүп, жыйынтыгын министрлер кабинетине беришкен. Жакынкы айларда дарыгерлердин, медайымдардын, кенже медициналык кызматкерлердин айлыктары көтөрүлөт», — дейт Алымкадыр Бейшеналиев.
Ал кошумчалагандай, 2021-жылдан тарта дарыгерлердин айлыгы эки эсеге көтөрүлөт. «Бүгүнкү күндө бир дарыгер орто эсеп менен 24 миң сом, участкалык милиция кызматкерлери 35 миң, медайымдар 17 миң сом алышат», — деди.
