Жалал-Абад шаарындагы Кадыржан Батыровдун аффилирленген жактарына таандык болгон борбордук базарлардын бири мамлекетке кайтарылды. Бул тууралуу УКМКнын басма сөз кызматы билдирди.
Маалыматка ылайык, баасы 412 миллион 111 миң сомду түзгөн «Шабдалы-Зар» соода-базар комплекси мамлекеттин менчигине кайтарылды.
Тергөөгө чейинки текшерүүнүн жүрүшүндө базар жайгашкан жер тилкеси Жалал-Абад шаарынын мэриясынын буйругуна ылайык 1994-жылы «Дустлик» ачык акционердик коому менен аффилирленген жеке компанияга бөлүнүп берилген. Ал жердеги акциялардын контролдук пакетинин 85 пайызы Кыргызстандагы өзбек коомчулугунун мурдагы лидери Кадыржан Батыровго таандык болгон.
Жер кодексине (1994-жылдын редакциясына) ылайык, мэриянын мамлекеттик жер тилкелерин бөлүп берүүгө (сатууга) укугу болгон эмес, мындай укукка шаардык кеңеш ээ болгон.
Жер тилкеси Кадыржан Батыровго мыйзамсыз сатылып, ал 2009-жылы жалган бүтүм аркылуу Кыргызстандын жарандары М.А. жана Р.Ш. (Кадыржан Батыров менен аффилирленген жактар) менен сатып алуу-сатуу келишимин түзгөн. Муну кылмыш ишинин материалдарына тиркелген архивдик документтер тастыктап турат. Аталган аймак бир нече жылдар бою соода базары катары колдонулган.