Бишкекте жана Чүй облусунда катуу шамалдан 154 объект жабыркады. Бул тууралуу Өзгөчө кырдаалдар министрлигинин басма сөз кызматы билдирди.
Алдын ала маалымат боюнча, 10 адам жабыркап, 70 социалдык объект, 80 турак үй, 4 чарбалык курулуш зыян көргөн.
Бишкек шаары боюнча 66 объект жабыркаган анын 26сы социалдык мекеме, 36сы турак үй, 4ү чарбалык курулуш болгон.
Ал эми Чүй облусунда 42 социалдык объект жана 42 турак үй, жалпысынан 84 объекттин чатыры учурулган.
Табигый кубулуштун кесепеттерин жоюу, материалдык чыгымдарды тактоо жана ыкчам чара көрүү максатында жергиликтүү жарандык коргонуу кызматтары иш алып барууда.
Эске салсак, кечээ Бишкек жана Чуй облусунун аймагында ылдамдыгы секундасына 26 метрге жеткен катуу шамал катталган. Бишкек шаарында жана Чүй облусунда өзгөчө кырдаал жарыяланган.
