Ош базарынын аймагындагы «Фирма Акиф» жоопкерчилиги чектелген коомунун эт базарында ири өлчөмдө салык төлөмдөрүн төлөөдөн качуу фактысы аныкталды. Бул тууралуу УКМКнын басма сөз кызматы билдирди.
«Акиф Фирма» ЖЧКсы кош бухгалтердик эсепти түзүп, соода жайларын жана орундарын ижарага берүүдөн чогултулган каражаттар тийиштүү түрдө документтештирилбей, финансылык документтерде эсепке алынбастан төлөм жүргүзүлгөн. Ошол эле учурда базар жетекчилери күн сайын ижарачылардан 100 миң сомго жакын акча чогултуп, бирок жеке баюу жана салык төлөөдөн качуу максатында каржылык отчеттордо алынган пайданын көлөмүн 90 пайызга чейин кем баалашкан», — деп айтылат маалыматта.
Ошондой эле анын жетекчилери алдамчылык аракеттери менен өзгөчө ири өлчөмдө жабырлануучунун мүлкүн тартып алганы аныкталган.
Жүргүзүлгөн ыкчам-иликтөө иш-чараларынын негизинде фирманын негиздөөчүсү жана башкаруучу директору кармалып, УКМКнын убактылуу кармоочу жайына киргизилди.
