Бүгүн Жогорку Кеңештин жыйынында коммерциялык эмес уюмдар жөнүндө мыйзам долбоорун экинчи окууда кароо үчүн комитеттерге кайтаруу чечими кабыл алынды. Бул тууралуу парламенттин вице-спикери Нурланбек Азыгалиев билдирди.
Анын айтымында, мындай сунуш конституциялык мыйзамдар, мамлекеттик түзүлүш, сот-укуктук маселелер жана регламент боюнча комитеттин төрагасынын орун басары Чынгыз Ажибаевден келип түшкөн.
«Биз бул мыйзам долбоорун бир нече жолу карадык. Депутаттардан сунуштар түштү. Учурда комитеттерде дагы бир жолу кылдаттык менен карап чыгуу укугубуз бар. Мыйзам долбоорунун демилгечилери да элдин оюн угат деп ойлойм», — деди Нурланбек Азыгалиев.
Добуш берүүдө 73 депутат Чынгыз Ажибаевдин сунушун колдоду.
