Коронавирусту жуктуруп алган Нарындын тургуну Пакистандан келген. Бул тууралуу Саламаттык сактоо министрлигинин өкүлү бүгүнкү маалымат жыйында билдирди.
Анын айтымында, 1959-жылы туулган Нарын шаарынын Городок аймагындагы Намирова көчөсүнүн тургуну 18-мартта Пакистандан келген.
«Ал 2019-жылдын 15-ноябрында Пакистанга даваатка кеткен. 2020-жылдын 15-мартында Лахол-Ташкент-Ташкент-Бишкек рейси менен саат 10:00дө «Манас» аэропортуна келген. Ташкентте Бишкекке учуучу каттамды 5-6 саат күтүшкөн. «Манас» аэропортунан үйдөн чыкпай отуруу, эч ким менен байланышпоо, дене табы көтөрүлсө «Тез жардамга» кайрылуу боюнча түшүндүрүү иштери жүргүзүлгөн», — деп айтылат маалыматта.
Бейтап Нарынга чейин Бишкек шаарында уулунун үйүндө төрт күн болгон. 19-март күнү Бишкек шаарынан Нарынга саат 15:00-16:00 чамасында 7 киши менен чогуу бир таксиде келген. 22-март күнү 18:30 чамасында Нарын облустук бириктирилген ооруканасына обсервацияга жаткырылып, анализ алынган. 28-мартта анализинен вирус табылган. Азыркы учурда изоляцияда. Абалы канааттандырарлык. Эч кандай даттануусу жок.
