Улуу Ата Мекендик согуштун жеңиш күнүн белгилөөнүн урматына согуштун бардык ардагерлерине 1 жолку кошумча жөлөк пул төлөнөт. Бул тууралуу өкмөттүн аппарат жетекчисинин орун басары Эмилбек Бусурманкуловдун төрагалыгы алдында өткөн жумушчу кеңешмеде айтылды.
Уюштуруу-даярдык көрүү иш-чараларына тиешелүү министрликтер жана ведомстволор тартылган.
Бишкек шаарынын Жеңиш аянтында митинг-реквием, майрамдык концерт өткөрүлүп, советтик мезгилдеги аскердик техника көргөзмөсү уюштурулат. Борбор калаада жана аймактарда Жеңиш күнүнө арналган көргөзмөлөр, салтанаттуу иш-чаралар өткөрүлмөкчү.
Негизги масштабдуу иш-чара — «Өлбөс полк» акциясы, ал салт боюнча Жеңиш күнүндө — 2019-жылдын 9-майында өтөт.
Мындан тышкары «тегерек үстөлдөр», жождордун студенттери үчүн лекциялар, жалпы билим берүү мекемелеринин окуучулары үчүн 1941-1945-жылдардагы Улуу Ата Мекендик согуштун ардагерлеринин катышуусунда класстык сааттар пландаштырылган.
