Кантта уурдалган баланы тапкан милиция кызматкерлери сыйланды

12 жашар Даниил Браилкиндин уурдалышынын бетин ыкчам ачкан ички иштер органдарынын кызматкерлери ээнчилүү саат менен сыйланды. Бул тууралуу өкмөттун маалымат кызматы билдирет.

Вице-премьер-министр Жеңиш Разаков оор кылмыштын бетин ачууда ыкчам жана ырааттуу иш алып барган милиция кызматкерлерине ыраазычылык билдирди.

«Милиционердин иши — өмүргө жана ден-соолукка коопсуздук туудурган жана коомдогу тартипти жана тынчтыкты сактоого багытталган татаал жумуш. Сиздер ириде жарандардын кызыкчылыгы үчүн эмгектенип жатасыздар. Ички иштер органдарынын кызматкерлеринин эмгегине объективдүү баа берүүнүн өзү — бул жарандардын ишеним көрсөтүүсү. Мындай ишенимди баалап, аны күн сайын чыңдоо зарыл», — деп белгиледи Жеңиш Разаков.

Премьер-министрдин энчилүү сааты менен Чүй облусунун Ысык-Ата районунун ИИБ тергөө кызматынын улук тергөөчүсү, милициянын капитаны Эрлан Мурзаканов, ИИМдин Криминалдык милиция кызматынын Үчүнчү башкармалыгынын уюшкан жана буйрутма кылмаштардын бетин ачуу бөлүмүнүн улук ыйгарым укуктуу оперкызматкери, милициянын капитаны Азимбек Үсөнов, Чүй облусунун ИИБ башкармалыгынын Криминалдык милиция кызматынын уюшкан кылмыштуулук менен күрөшүү бөлүмүнүн ыйгарым укуктуу оперкызматкери, милициянын лейтенанты Жеңиш Кулубаев сыйланды.

Андан тышкары, Ринат Артыкбаев, Бакыт Насирдинов, Өмүрбек уулу Сүйөрбекке алкыш жарыяланды.

Вице-премьер-министр 12 жашар Даниил Браилкинге эстеликке белек берип, ага чың ден соолук жана окуудагы ийгиликтерди каалады.