Чүй облусуна караштуу Арашан айылында жергиликтүү тургундар ичүүчү таза суусу жок калышты. Бул тууралуу «24.kg» агенттигине жашоочулар билдиришти.
Алардын айтымында, айыл өкмөт башчысы айылдык кеңештин 5 депутаты менен үймө-үй кыдырып, суунун акысын төлөгөндүгү тууралуу квитанцияны көрсөтүүнү талап кылышкан.
«Сууга болгон төлөмдөрдү убагында төлөп жүргөн тургундардын баары суусуз калышты. Биздин эч кандай карызыбыз жок, документтерибизди көрсөткөнбүз. Бирок, сууну токтотуп салышты», — дешти айылдыктар.
Алардын пикиринде, айыл өкмөтүнүн чечими мыйзамсыз.
Айыл өкмөтүнөн билдиришкендей, карызы бар тургундарга гана таза суу берүү токтотулган.
