Тажикстандын Улуттук банкы дүйнөлүк базарда мамлекеттик баалуу кагаздарды сатуу ийгиликтүү башталганын билдирди. Мекеменин сайтындагы маалыматка караганда, өлкөнүн жумушчу тобу АКШ, Улуу Британия жана Швейцариянын ири инвесторлору менен жолугушуп, Рогун ГЭСин куруп бүткөрүү үчүн 500 миллион долларлык облигация сатуу боюнча сүйлөшүүлөрдү өткөрдү. Бул тууралуу «Озоди» маалымдайт.
Улуттук банктан билдиришкендей, баалуу кагаздардын 38% АКШлык, 24% улуу британиялык, 35% Европа биримдигине мүчө өлкөлөрдүн жана 3% Азия мамлекеттеринин инвесторлору сатып алышты.
«Ийгиликтүү сүйлөшүүлөрдөн кийин Тажикстандын мамлекеттик баалуу кагаздарын сатып алуу боюнча инвесторлордун сунуштары 4,5 миллиард АКШ долларына чейин көбөйдү», - деп айтылат мекеменин билдирүүсүндө.
Улуттук банктын маалыматы боюнча, сапардын алкагында Тажикстандын жумушчу тобу ири инвестициялык компаниялардын 300дөн ашык өкүлдөрү менен жолугушту.
Тажикстан бийлиги Рогун ГЭСин куруп бүткөрүү үчүн 1 миллиард долларлык баалуу кагаздарды чыгарууну чечкен. Алгачкы этабында дүйнөлүк базарга сатыкка 500 миллион долларга бааланган облигациялар чыгарылды. 21-июлда тажик парламенти өлкөнүн энергетика тармагын каржылоо үчүн мамлекеттик баалуу кагаздарды чыгаруу боюнча өкмөттүн сунушун жактырган.
Тажикстандын башкы энергетикалык долбоору эсептелген Рогун ГЭСин куруп бүткөрүүгө 4 миллиард долларга жакын каражат керектелет. Өлкөнүн Каржы министрлигинин маалыматына караганда, «Рогун ГЭСи» ачык акционердик коомунун акцияларын сатуу менен калктан 80 миллион доллардан ашык акча чогултууга мүмкүн болду. Быйыл ГЭСтин курулушуна деп мамлекеттик бюджеттен 2 миллиард сомони бөлүнгөн.
