Мамлекеттик салык кызматы 2024-жылдын жыйынтыгы боюнча бирдиктүү салык декларациясын кабыл алуу өнөктүгүнүн экинчи этабын өткөрүүдө, ал ушул жылдын 1-майына чейин уланат.
Ведомстводон маалымдашкандай, көрсөтүлгөн мөөнөткө чейин салык декларациясын тапшырууга төмөнкүлөр милдеттүү:
— жеке ишкерлер;
— патенттин негизинде же өзгөчө режимдеги соода аймагында иш жүргүзгөн жеке жактар;
— чет мамлекеттин аймагында турган эл аралык уюмдарда, дипломатиялык жана консулдук мекемелерде иштеген КРнын жараны;
— киреше салыгын кармоо милдеттенмеси пайда болбогон субъекттен салык салынуучу киреше алган жеке жактар.
Белгилей кетсек, 1-апрелде салык декларациясын кабыл алуу өнөктүгүнүн биринчи этабы аяктаган.
Бул этаптын алкагында декларацияны төмөнкүлөр тапшырууга милдеттүү болгон:
— ата мекендик уюмдар (бюджеттен каржылануучу жана отчеттук салык мезгили үчүн мүлк салыгы боюнча салыктык милдеттенмелери болбогон уюмдардан тышкары);
— туруктуу мекеме түзүү менен Кыргызстанда иштеген чет өлкөлүк уюмдар;
— мамлекеттик жана муниципалдык кызматкерлер.
Толук маалыматты аймактык салык органдарынан, 116 номери аркылуу же Салык кызматынын www.sti.gov.kg расмий сайтынан алууга болот.
