Баткен облусунун Кадамжай районундагы Кыргыз-Кыштак айылында өрүктүн ультра эрте сорттору отургузулган жаңы бакча түзүлүүдө. Суу чарба, айыл чарба жана кайра иштетүү өнөр жай министрлигинин басма сөз кызматы билдиргендей, аталган бакчада мекеменин жетекчиси Бакыт Төрөбаев жеринен тышкаркы жыйын өткөрдү.
Жыйындын жүрүшүндө долбоордун артыкчылыктары талкууланып, аны башка аймактарга жайылтуу маселелери каралды.
Белгилей кетсек, бакты отургузуу бир нече этапка бөлүнгөн. Негизинен 160 метр тереңдиктеги кудук (скважина) бургуланып, суу сактагыч, тамчылатып сугаруу системасы жана тосмо GPS жабдуулары менен такталып долбоорлонгон.
Мында өрүктүн ультра эрте сорттору отургузулуп, сугаруу үчүн заманбап материалдарды колдонуу менен тамчылатып сугаруу системасы ишке киргизилген. Ага катар климаттын оор шарттарына карата суунун туруктуу көлөмү аныкталып, 6500 м³ суу сактагыч курулган.
Жыйындын соңунда аталган долбоорду облустун башка аймактарына жайылтуу жана тажрыйба алмашуу боюнча семинарларды өткөрүү тууралуу бир катар чечимдер кабыл алынды.
