3-сентябрда Жогорку Кеңешке А.Акаевден экс-президент макамын кайтаруу тууралуу кат келип түшкөн. Кат Конституциялык мыйзамдар, мамлекеттик түзүлүш, сот-укуктук маселелер жана Турак жай кодексинин регламенти боюнча комитетинин кароосуна жөнөтүлгөн.
Бүгүн, 24-сентябрда бул маселени талкуулоодо депутат Гуля Кожокулова кырдаалды дыкат иликтеп, негиздүү чечим кабыл алуу үчүн убактылуу комиссия түзүүнү сунуштады.
Жанарбек Акаев эгер качкын президенттин өтүнүчү Жогорку Кеңеш тарабынан канааттандырылса, коом түшүнбөй турганын белгилеп, каршы пикирин билдирди.
Бул маселе боюнча коомчулуктун позициясы азыртадан эле белгилүү. Акаевдин тушунда Аксыда ондогон адамдар окко учкан. Ачкачылык акциясын баштаган патриот Шерали Назаркулов Ак үйдүн алдында каза болду. Акаев да массалык түрдө адам укуктарын бузууга жол берип, анын аракеттери өлкөдө үй-бүлөлүк-кландык башкарууга жол ачкан. Акаевдин кемчиликтери жөнүндө бүтпөс сөз айтууга болот. Ушуга байланыштуу суроо туулат: эмне үчүн мындай адамдын статусун кайтарып, резиденцияда багуу менен камсыз кылышыбыз керек?
Жанар Акаев
Жыйынтыгында депутаттар комиссия түзүү сунушуна каршы добуш беришти. Комитет Аскар Акаевдин билдирүүсүн эске алып, аны Жогорку Кеңештин кароосуна киргизди. Ошондой эле парламентке анын убактылуу депутаттык комиссия түзүү жөнүндөгү арызын канааттандыруудан баш тартууну сунуштады.
Эске салсак, А.Акаев өлкөнү 1990-2005-жылдары башкарган. 2005-жылдын 24-мартында үй-бүлөлүк, авторитардык жана коррупциялык бийликке каршы «жоогазын революциясы» деп аталган төңкөрүштүн натыйжасында бийликтен кулатылган. Ошондон кийин А.Акаев Кыргыз Республикасынан чыгып кетип, андан бери Россияда жашап келет.
