Бишкекте төрт жыл мурдагы каракчылыкка шек саналган жаран кармалды
10:47, 14 мая 2024, Бишкек - 24.kg
Бишкекте каракчылыкка шектүү жаран кармалды. Бул тууралуу Бишкек шаардык ички иштер башкы башкармалыгынын басма сөз кызматы билдирди.
Маалыматка ылайык, 2020-жылдын 14-ноябрында милицияга М.У. аттуу жаран белгисиз адамдарга карата чара көрүү арызы менен кайрылган. Алар Төрөкул Айтматов көчөсүндөгү жеке үйлөрдүн бирине мыйзамсыз кирип, тапанча менен коркутуп, уюлдук телефондорун алып, белгисиз тарапка качып кетишкен.
Кылмыш-жаза кодексинин 207-беренесине (Каракчылык) ылайык кылмыш иши козголгон.
2020-жылы каракчылык боюнча үч шектүү кармалып, убактылуу кармоочу жайына киргизилген.
Өзүнчө козголгон кылмыш ишинин алкагында 1990-жылы туулган К.Т. аттуу башкы уюштуруучусу кармалып, тергөө абагына камакка алынды. Кылмыш ишин иликтөө уланууда.
