Кадамжайда мечиттин курулушуна чогултулган акчаны уурдап кетишкен
15:30, 10 мая 2024, Бишкек - 24.kg
Баткен облусунда мечиттин курулушуна топтолгон акчаны уурдоого шек саналган жаран кармалды. Бул тууралуу облустун ички иштер башкармалыгы билдирди.
Маалыматка ылайык, Таш-Дөбө айылындагы «Зийабидин ажы» мечитинде курулушка топтолгон 67 миң 500 сомду белгисиз адамдар уурдап кеткен.
Кылмыш жаза кодексинин 205-беренеси (Уурулук) менен кылмыш иши козголгон.
Шектүү катары Лейлек районунун 31 жаштагы тургуну К.Б. кармалды. Ал мурда сот жообуна тартылган.
Уурдалган акча мечитке кайтарылды. Кармалган жаран убактылуу кармоо жайына киргизилип, учурда тергөө иштери жүрүп жатат.
