Кыргызстан транспорттук долбоорлор үчүн Европадан инвесторлорду издейт
11:22, 16 января 2024, Бишкек - 24.kg
Тышкы иштер министри Жээнбек Кулубаев Европа комиссиясынын вице-президенти Маргаритис Скинас менен жолугушту. Бул тууралуу мекеменин басма сөз кызматы билдирди.
Тараптар Кыргызстандын делегациясынын 29-30-январда Брюссель шаарында өтө турган Global Gateway инвесторлор форумуна катышуу маселесин талкуулашты.
Анын алкагында Кыргызстан транспорт тармагындагы келечектеги долбоорлорду сунуштайт.
Тараптар гидроэнергетика, санариптештирүү, суу ресурстары жана "жашыл"экономика тармактарындагы долбоорлорду ишке ашыруунун учурдагы абалын жана келечеги боюнча пикир алмашышты.
Кыргызстан так кайсы долбоорлорду сунуштай турганын ТИМ тактаган жок.
