Түркия март айында Тажикстан менен Кыргызстандын ортосундагы чек ара маселеси чечилерине үмүт артууда. Бул тууралуу Anadolu агенттиги билдирди.
«Тажикстан менен Кыргызстан чек ара талашын март айында чечет деп ишенебиз. Бул аймактын коопсуздугу жана туруктуулугу үчүн олуттуу кадам болот», — деп билдирди журналисттерге Түркиянын тышкы иштер министри Тажикстандын президенти Эмомали Рахмон жана тышкы иштер министри Сироджиддин Мухриддин менен 10-январда Душанбеде болгон жолугушууларынан кийин.
Хакан Фидан Түркиянын региондогу өлкөлөр менен кызматташтыгы Ооганстанда туруктуулукту камсыз кыларын белгилеп, Тажикстан Борбор Азиядагы туруктуулукка өзгөчө маани берерин кошумчалады.
Түркиянын тышкы иштер министри түрк жана тажик коопсуздук күчтөрү радикал уюмдар менен күрөшүүдө кызматташа турганын билдирди.
Ал эки өлкө лидерлеринин биргелешкен демилгелер аркылуу бардык деңгээлде жана бардык тармактарда мамилелерди өнүктүрүүгө чечкиндүүлүгүн белгиледи.
Түркиянын тышкы иштер министри Хакан Фидан Кыргызстанга 9-январда келген. Кыргызстандын президенти, тышкы иштер министри жана парламент спикери менен жолугушуулардан кийин Душанбеге учуп кеткен.
