Жалал-Абадда 9-январдан тарта метандын жоктугунан улам ишин токтоткон автобустар кайра каттамга чыкты. Бул тууралуу 24.kg сайтына мэриянын басма сөз кызматы билдирди.
Белгилей кетсек, буга чейин президент Садыр Жапаров Жалал-Абадга газ менен жүргөн 50 жаңы автобус берген. Кийинчерээк белгилүү болгондой, газ куюучу станцияларынын жоктугунан улам аны Өзбекстандан толтурууга туура келген. 2023-жылдын 20-декабрынан тартып алар иштебей калган.
«Былтыр декабрь айында күн суук болгондо, Өзбекстандын өзүндө газ тартыш болуп, Жалал-Абаддагы автобустарга метан газын бербей калган. Учурда абал турукташып, 20 автобус каттамга чыгып, иштеп жатат. Алар метан газы менен жүргөндүктөн Өзбекстанга кирип, толтуруп чыгып жатышат. Бирок бул убактылуу», — деп билдиришти мекемеден.
Мэрия өзбекстандык инвесторлор менен сүйлөшүлүп, Сузак районунун аймагына газ куюучу станциянын курулушу башталганын, иштердин 70 пайызы бүткөнүн кошумчалады.
