Чолпон-Ата шаарындагы «Алтын балалык» реабилитациялык борборунда 14 жаштагы кыз сууга чөгүп кетти. Дагы бир кыз ооруканада жатат. Бул тууралуу 24.kgге маркумдун эжеси Жазгүл Кылычбекова билдирди.
Анын айтымында, окуя 5-августта болжол менен саат 10:30да болгон.
«4-августта Нарын облусунун уран калдыктары сакталган Миң-Куш айылынан президент Садыр Жапаровдун демилгеси менен 238 бала «Алтын балалыкка» эс алууга жөнөтүлгөн. Башында мугалимдер жана ата-энелер топтун жетекчиси катары барышат деп айтылган. Бирок жыйынтыгында, алдардын ата-энелери болбогон бир нече мугалим жана аялдарды неберелери менен жөнөтүштү. Алар 4-август күнү реабилитациялык борборго келгенден кийин ичип алышып, кийинки күнү балдарды караганга алдары келбей калган. Ошентип, 5-августта менин сиңдим менен дагы бир кыз чөгүп кетишти. Сиңдимди суудан иним алып чыкты, бирок медиктер өз убагында жардам көрсөтө албай, каза болду. Экинчи кыз реанимацияда жатат», — деди Жазгүл Кылычбекова.
Ал кыздын өлүмү тууралуу жакындарына дароо кабарлашпаганын айтты.
«Менин кызым дагы бул балдар менен эс алып жүргөн. Көрсө, балдардын телефондорун тартып алышып, окуя жөнүндө эч кимге айтпагыла деп талап кылышыптыр. Бирок менин кызым башка мектепте окугандыктан, анын телефонун алышкан эмес. Ал мага чалып, бардыгын айтып берди», — деди маркумдун эжеси.
Жазгүл 11 жаштан 14 жашка чейинки 238 балага 9 гана вожатый болгонун, ал эми борбордо куткаруучулар жок экенин билдирди.
«Биз сиңдимдин өлүмү үчүн кенемте талап кылбайбыз. Биз борбордо куткаруучулар жоктугуна жана айыл өкмөтү балдарга эч кандай тиешеси жок аялдарды кичинекей неберелери менен жөнөткөнүнө нааразыбыз. Алардын балдарды караганга убактысы да болгон эмес. Бул окуяга карабастан, алар эч нерсе болбогондой ал жакта дагы деле эс алып жүрүшөт. Кыздарга керектүү алгачкы медициналык жардам көрсөтүлбөгөнүнө да нааразыбыз», — деди Жазгүл Кылычбекова.
Буга байланыштуу ал «Алтын балалык» реабилитациялык борборунун администрациясын жана шалаакылыгы үчүн топтун жетекчилерин жоопко тартууну өтүнөт. Ошол эле учурда, аял соттук-медициналык экспертиза өткөрбөстөн өлүкканадан сөөктү алып кетип жатканда, туугандарынан тосмо арыз жазып берүүлөрүн суранышканын кошумчалады.
«Биз сөөктү дароо эле Нарынга алып кеттик. Анткени моргто жылуу болгондуктан, экспертиза жүргүзүлгөн убакта сөөк бузулуп баштамак», — деп түшүндүрдү аял.
Комментарий берип жатып, Ысык-Көл ОИИБ 24.kgге 5-августта «Алтын балалык» эс алуу үйүнүн жанындагы жээкте эки жашы жете элек бала сууга чөгүп кеткени тууралуу тез жардам станциясынан кабар түшкөнүн маалымдашты.
Окуя болгон жерге барган райондук милициянын тергөө-ыкчам тобу бул күнү Нарын облусунан келген 14 жаштагы кыздар сууга түшүп жатып, алардын бири чөгүп кеткенин аныкташкан.
«Экинчи кызды дарыгерлер эсине келтирип, ал райондук оорукананын жандандыруу бөлүмүндө жатат», — деп билдиришти ОИИБден.
