Кыргызстанда телевидения аркылуу жүргүзүлгөн пропагандасынын таасири тууралуу кыска метраждуу тасманын бет ачары болду. Бул тууралуу 24.kg агенттигине тасманын авторлору билдирди.
«Бункер» - мамлекеттик телекөрсөтүүлөрдүн пропагандасынын чындыкты кабылдоону бурмалап, «тышкы дүйнөдө» эмне болуп жатканын жашырып, миллиондогон адамдарга тийгизген терс таасирин чагылдырган 15 мүнөттүк кыска метраждуу тасма.
Режиссер Адилет Макенов белгилегендей, тасма сынчыл ой-жүгүртүүнү, фактчекинг инструменттерин колдонуу жөндөмүн өнүктүрүү жана телевизордон, соцтармактардан алынган маалыматты кылдат текшерүү зарылчылыгы жөнүндө ойлонууга багытталган.
«Биз күн сайын социалдык тармактарда текшерилбеген тонна маалыматты бөлүшүп жаткан адамдарды көрөбүз, алар фактчекинг инструменттерин колдонгонду билбеген адамдарга кандай таасир этиши мүмкүн экенин эч ойлонушпайт. Биздин ата-энелерибиз өзгөчө коопту жагдайда. Себеби алар телевизордон айтылган нерсенин барына ишенүүгө көнүшкөн. Бул тасма менен биз маалыматты манипуляциялоо кайгылуу натыйжаларга алып келерин көрсөткүбүз келди», — деп билдирди ал.
Фильм 2023-жылы Казахстан жана Украина менен биргеликте тартылган. Тасмада башкы ролду кыргызстандык актриса Сайкал Жумабекова, ал эми экинчи пландагы ролду казахстандык актриса Айдана Абпасова аткарган. Мындан тышкары, Руслан Харизов, Нурийля Матиева, Нуркыз Тунгаратова, Рыскүл Кубанычбек кызы, Жаңыл Чыңгышева жана Алина Фурсова кинодо роль жаратышкан.
