Элге электр жаргын маал-маалы менен өчүрүү планы тууралуу алдын ала маалымат берүү зарыл. Бул тууралуу Жогорку Кеңештин отун-энергетика комплекси боюнча комитетинин жыйынында депутат Исхак Масалиев билдирди.
Өлкөнүн аймактарында электр жарыгы 6-7 саатка өчүрүлөрүн депутат айтты.
«Энергетика министри бир саатка гана өчүрө алаарын айткан. Бирок иш жүзүндө, Аламүдүн районунда саат 7ге чейин электр жарыгы жок болот. Эгерде жарыкты маал-маалы менен өчүрүүнү пландаштырып жатсаңыздар, анда бул тууралуу алдын ала маалымат берүү керек. Кыш кандай болот деп күтүп жатасыздар? Токтогулда суунун көлөмү канча?» — деп суроо узатты Исхак Масалиев.
Энергетика министринин орун басары Сабырбек Султанбеков Токтогулда суунун көлөмү 2021-жылга салыштырмалуу 1,5 миллиард куб метрге көп экендигин жооп катары айтты.
«Биздин божомолдор боюнча орточо жылдык температура болот», — деди чиновник.
