Өзбекстанга AstraZeneca вакцинасынын 660 миң дозасы жеткирилди
17-мартта Индиядан Ташкентке коронавируска каршы COVISHIELD вакцинасынын 660 миң дозасы жеткирилди. Өзбекстан бул каражаттарды COVAX программасынын алкагында бекер алды.
ЮНИСЕФ тарабынан берилген вакцинанын жалпы баасы 1,98 миллион долларды түзөт.
Расмий билдирүүдө COVISHIELD индиялык өндүрүүчүлөр AstraZeneca вакцинасына берген аталыш экени көрсөтүлгөн эмес.
Буга чейин AstraZeneca менен эмделген айрым адамдардын тамырында тромб пайда болгонуна байланыштуу Дания, Норвегия, Исландия, Италия, Германия, Франция, Испания жана Болгария аталган вакцинаны колдонууну убактылуу токтотушкан.
COVAX программасы жакыр мамлекеттерге COVID-19га каршы вакциналарды бекер берүү үчүн түзүлгөн. Расмий маалыматтар боюнча бул программанын алкагында Өзбекстан 2021-жылы AstraZeneca вакцинасынын 2,64 миллон дозасын алат.
