№ 73809 аскер бөлүгүнүн жоокерлери сотко кайрылышып, аларды сабаганга шектүү офицерлердин ар биринен 200 000 сомдон талап кылышууда. Бул тууралуу 24.kg агенттигине «Кылым шамы» укук коргоо борборунун башчысы Азиза Абдирасулова билдирди.
Айтымында, экинчи кылмыш ишин алгачкы жардам көрсөтпөгөн фельдшерге карата козгошту. Ишти Аламүдүн райондук сотуна жиберишти. Азиза Абдирасулованын айтымында, жоокерлер эми күбө катары суралбай, жабырлануучу катары саналууда.
Эске салсак, жоокерлер укук коргоочуларга шылдыңга тушугуп жаткандарын айтып арызданышкан. Айтымдарында, аларды айылдарга алып барып кык ташытып, унааларды оңдоттуруп, арык тазалатышкан.
