Кыргызстандык балбан Айпери Медет кызы Амманда (Иордания) өтүп жаткан эркин күрөш боюнча Азия чемпиону болду. Бул тууралуу United World Wrestling сайты билдирди.
76 килограмм салмакта финалда индиялык Ритика менен беттешип, 7:6 эсебинде жеңишке жетти.
Белгилей кетсек, беттештин бүтөрүнө 15 секунд калганда атаандашы 6:2 эсебинде алдыда келе жатканы менен Айпери Медет кызы кайтарып алып, алдыга озуп чыкты.
Эске салсак, грек-рим күрөшү боюнча балбан Раззак Бейшекеев күмүш байгеге ээ болсо, 77 килограммга чейинки салмак ченинде Ырыскелди Максатбек уулу 3-орунга ээ болгон.
Күрөш боюнча Азия чемпионаты 30-мартта жыйынтыкталат.
