Бүгүн, 16-декабрда президент Садыр Жапаров 549 үй-бүлөгө жаңы батирлердин ачкычын салтанаттуу түрдө тапшырды. Турак-жай Мамлекеттик ипотекалык компания (МИК) тарабынан курулуп, Бишкектин Скрябин көчөсүндө жайгашкан.
Иш-чаранын жүрүшүндө мамлекет башчысы жарандарды жеткиликтүү турак-жай менен камсыздоонун маанилүүлүгүн белгиледи.
«Эл алдындагы негизги милдеттердин бири — бардык муктаж болгондорду турак-жай менен камсыз кылуу. Бүгүнкү күндө 40 миңге жакын жаран турак жай алуу үчүн кезекте турат. Биз маселенин масштабын түшүнөбүз жана аны акырындап чечип жатабыз. Маселен, учурда батирге муктаждар үчүн бир нече объектилер курулуп жатат. Буга чейин Мамлекеттик ипотекалык компаниясы коммерциялык банктар аркылуу иштеген, бул турак жайдын кымбатташына себеп болгон. Азыр биз турак-жайды арзандатуу үчүн мамилени өзгөртүп жатабыз», — деп белгиледи Жапаров.
Жаңы турак жай комплекси төмөнкүлөрдү камтыйт:
батирлердин жалпы саны: 549;
үйлөрдүн саны: 7 блок (ар бири 15 кабат);
батирлердин түрлөрү боюнча бөлүштүрүү:
1 бөлмөлүү: 202 батир;
2 бөлмөлүү: 202 батир;
3 бөлмөлүү батирлер: 145 батир.
