Кыргызстанга канадалык DeHavilland Aircraft өндүрүүчүсүнөн Asman Airlines Dash 8 400 мамлекеттик авиакомпаниясы үчүн экинчи учактын келиши күтүлүүдө. Бул тууралуу «Манас» аэропортунун басма сөз кызматы билдирди.
Маалыматка ылайык, экинчи борт 80 жүргүнчүнү ташууга жөндөмдүү, турбовинттүү эки моторлуу кыска аралыкка учуучу учак болуп саналат.
«Улуттук авиакомпаниянын жаңы паркын ишке киргизүү Кыргыз Республикасынын жарандык авиациясынын тарыхында жаңы баракты ачат», — деп айтылат билдирүүдө.
Эскерте кетсек, сентябрь айында Бишкек-Талас багыты боюнча «Асман» авиакомпаниясынын биринчи учагы алгачкы техникалык учуусун жасаган.
Asman Airlines авиакомпаниясы 2023-жылы негизделген. Бул убакыттын ичинде ал өз командасын даярдап, кызматкерлерди окутууга жетишкен. 80 орундуу биринчи Q400 учагы жайында келген. Ноябрга чейин компания үчүнчү учак сатып алууну пландаштырууда.
Анын учкучтарын канадалык адистер, ал эми стюарддарын Россия Федерациясынын аймактарында ийгиликтүү учуп жүргөн россиялык «Аврора» авиакомпаниясы даярдайт.
Asman Airlines авиакомпаниясы ошондой эле жаңы учуу форматын киргизди. Анда учактар үч бурчтуу түрдө учушат башкача айтканда бир шаардан экинчисине аралык конууларды жасашат. Авиакомпания Кыргызстандын бардык 11 аэропортун тейлейт.
